Gwyliau bwyd a diod Cymru

Mwynhewch gynnyrch lleol godidog, ymlaciwch i sŵn cerddoriaeth fyw, a rhowch gynnig ar weithgareddau o bob math yn un o wyliau bwyd Cymru. Mae marchnadoedd sy’n llawn cynnyrch, dosbarthiadau meistr, arddangosfeydd coginio ac adloniant i’r teulu i gyd yn gynhwysion gwych sy’n sicr o roi diwrnod i’r brenin i chi. Ac wrth gwrs, fe gewch gyfle hefyd i flasu a phrynu amrywiaeth o fwydydd a diodydd o Gymru.

Mae llawer o ddigwyddiadau bwyd ardderchog yn cael eu cynnal gydol y flwyddyn, a’r rheini’n rhoi llwyfan i gynnyrch o bob math. Yn eu plith nhw mae rhai o fwydydd a diodydd enwocaf Cymru, fel gwirodydd, cawsiau a chig oen Cymreig.

Gŵyl Fwyd y Drenewydd

06 a 07 Medi 2025

Mae gŵyl fwyd y Drenewydd yn dod yn fyw bob mis Medi. Mae’r ŵyl yn arddangos bwydydd a diodydd Cymreig o bob math, gyda cherddoriaeth gan artistiaid lleol, a’r cyfan yn digwydd o amgylch tref farchnad brydferth y Drenewydd. Gyda chefn gwlad godidog y canolbarth yn gefnlen, digwyddiad rhad ac am ddim yw hwn sy’n rhoi gwerth gwych am arian. Bydd manylion y digwyddiad i’w gweld ar dudalen Facebook @NewtownFoodFest.

Gŵyl Fwyd Amgueddfa Cymru, Sain Ffagan

Caerdydd, i’w gadarnhau, Medi 2025

Bydd Gŵyl Fwyd Amgueddfa Cymru yn dychwelyd yn fwrlwm i Amgueddfa Werin Cymru yn Sain Ffagan, Caerdydd. Mae gan yr ŵyl dros 80 o stondinau bwyd, diod a chrefftau, ynghyd ag arddangosfeydd coginio, gweithgareddau bwyd i’r teulu i gyd, a cherddoriaeth.

Ffair Fêl Conwy

13 Medi 2025

Yn ôl pob sôn, Ffair Fêl Conwy yw un o wyliau bwyd hynaf Prydain, a honno’n bodoli ers dros 700 mlynedd. Mae Siarter Brenhinol Edward I yn datgan bod yn rhaid ei chynnal ar yr un dyddiad bob blwyddyn – 13 Medi – oni bai mai dydd Sul yw hwnnw. Os hynny, bydd yn cael ei chynnal ar y dydd Llun canlynol. Yn y ffair hon, fe allwch chi ddisgwyl mêl, cynhyrchion mêl, stondinau cadw gwenyn, cyffeithiau, danteithion melys a chynhyrchion a chrefftau eraill.

Gŵyl Fwyd a Diod yr Wyddgrug

I’w gadarnhau, Medi 2025

Digwyddiad bendigedig arall yw Gŵyl Fwyd a Diod yr Wyddgrug, gŵyl sy’n rhoi llwyfan i amrywiaeth arbennig o gynnyrch y dref a’i chyffiniau. Mae digonedd i gadw pawb yn brysur yn yr ŵyl fwyd hon, gyda gweithgareddau, ysgol goginio ac arddangosfeydd gan gogyddion.

Gŵyl Fwyd y Fenni

20 a 21 Medi 2025

Yn Sir Fynwy y cynhelir Gŵyl Fwyd y Fenni – ardal sy’n enwog am ei hoffter o fwyd. Mae’r penwythnos hwn yn un o’r gwyliau bwyd amlycaf yn y calendr yng Nghymru. Yn ogystal â dosbarthiadau meistr gan gogyddion enwog, arddangosfeydd a sgyrsiau, mae digonedd o adloniant ysgafn a gweithgareddau difyr i’w cael hefyd, gan gynnwys teithiau tywys sy’n mynd â chi i fforio. Ac mae llwyth o bethau eraill i’w gwneud yn y Fenni a’r cylch, sy’n gwneud hwn yn benwythnos cwbl werth chweil.

Gŵyl Fwyd a Chrefft Portmeirion

06, 07 ac 08 Rhagfyr 2024

Mae gan Ŵyl Fwyd a Chrefft Portmeirion gartref cwbl odidog: tir a gerddi’r pentref Eidalaidd lliwgar yn Eryri. Mae yno 120 o stondinau a chytiau sy’n dathlu cynhyrchion a busnesau Cymreig, tra bydd cerddoriaeth fyw, arddangosfeydd coginio, gweithdai a Groto Nadolig hudolus yn rhoi mwy fyth o adloniant.

Mwynhewch wledd i’r teulu, a honno’n llawn cynnyrch Cymreig, yng Ngŵyl Fwyd a Diod Cydweli. Gŵyl yw hon sy’n cael ei chynnal yng Nghanolfan Tywysoges Gwenllian, ac mae yma ddetholiad o’r bwydydd a’r diodydd gorau o Gymru, ynghyd â gwneuthurwyr arbenigol a pherfformwyr.

Gŵyl undydd sy’n gadael i chi yfed tra bydd rhywun arall yn gyrru? Syniad perffaith.erffaith. Bydd yr ŵyl hon yn cael ei chynnal ar wahanol ddiwrnodau yn ystod y flwyddyn ym Mro Morgannwg, Eryri, Conwy a mannau eraill, gyda’r Llwybr Cwrw Go Iawn (The Real Ale Trail) yn trefnu bws a fydd yn galw heibio i dafarndai lleol i’ch gollwng a’ch codi yn eich tro. Bydd gan bob tafarn o leiaf dri chwrw rhagorol i’w cynnig, yn ogystal â bwyd cartref ac adloniant.

Mae Gŵyl Fwyd Caernarfon yn ŵyl sy’n llyncu’r dref gyfan, o’r marina i’r castell, gan lenwi’r strydoedd â gweithgareddau a bwydydd hyfryd. Mae yma gerddoriaeth fyw, digonedd o stondinau bwyd a chrefftau, ardal i’r plant, bwyd stryd, a bariau i ymweld â nhw.

Canolfan Dreftadaeth Gŵyr yw’r lle i fod yn ystod Penwythnos Caws a Seidr Gŵyr. Mwynhewch benwythnos cyfan lle cewch chi roi cynnig ar bob math o seidr a chaws, gan gynnwys rhai sy’n cael eu creu ar y safle. Bydd cerddoriaeth fyw yn yr iardiau hefyd.

Gŵyl sy’n cael ei chynnal dros Ŵyl y Banc yw Gŵyl Fwyd a Diod y Bont-faen. Bydd wastad rywbeth at ddant pawb o bob oed yn y digwyddiad hwn sy’n un o uchafbwyntiau’r byd bwyd. Mae yma gigoedd gwych, prydau figan, cyrris a chawsiau, siytnis a seidr, jin o safon, danteithion melys a chymaint mwy. Yn ogystal â’r ffefrynnau arferol sy’n denu’r torfeydd, mae sôn y bydd sawl arddangoswr newydd a chyffrous yno hefyd!

Ochr yn ochr â phrif safle’r ŵyl, bydd Gerddi’r Hen Neuadd yn llawn dop o weithgareddau i’r teulu oll eu mwynhau: plygu helyg, pétanque, adar ysglyfaethus, ac am y tro cyntaf yn yr ŵyl, bydd Llwybr Bwyd y Fro yn dathlu cynaliadwyedd gyda rhaglen o ddigwyddiadau llawn hwyl. Mae disgwyl i’r arddangosfeydd bwyd poblogaidd ddychwelyd hefyd, gyda rhagor o adloniant yn y Duke of Wellington ar y stryd fawr. Ewch i gael rhagor o wybodaeth am y Bont-faen.

Traeth y De yw’r lle i fod pan gynhelir yr ŵyl fwyd wych hon yn Ninbych-y-pysgod, a honno’n rhoi llwyfan i’r bwyd stryd gorau y gallwch chi’i ganfod. Mae gan Ŵyl Fwyd Stryd Sir Benfro stondinau niferus sy’n cynnig pob math o fwydydd o bob cwr o’r byd, gan gynnwys danteithion o Wlad Groeg, Korea, Morocco, Afghanistan a Mecsico. Mwynhewch fwy o atyniadau gwych Dinbych-y-pysgod tra byddwch chi yno.

Yng nghanol yr haf y cynhelir Gŵyl Bwyd a Diod Caerdydd a honno’n gyfle dros dridiau i fwynhau pob math o ddanteithion ym Mae Caerdydd. Bydd dros 100 o gynhyrchwyr bwyd a diod yn bresennol, a bydd yno hefyd gerddoriaeth fyw a phob math o arddangosfeydd a gweithdai. Mae’r ŵyl awyr agored hon yng Nghaerdydd yn denu torfeydd rif y gwlith pan fydd y tywydd yn braf. I wylio pobl mewn steil, bachwch sedd yn y Bar Siampên a mwynhau gwydryn o ddiod oer a phefriog.

A honno’n cael ei chynnal ar ddydd Sadwrn yn niwedd mis Gorffennaf, ac wedi’i lleoli ar lawntiau braf campws Prifysgol Cymru Y Drindod Dewi Sant, mae gan Ŵyl Fwyd Llanbed ddigonedd o bethau i ddifyrru teuluoedd. Mae yma stondinau atyniadol yn llawn dop o lysiau organig, caws arbenigol, cacennau bach amheuthun a chyffeithiau hen ffasiwn, ynghyd â cherddoriaeth fyw gan fandiau lleol.

Yn Neuadd y Frenhines y cynhelir Gŵyl Gaws Arberth, a honno’n rhoi llwyfan i ddetholiad o gawsiau Cymreig lleol, yn ogystal â seidr, gwirodydd, cwrw a gwin i’w prynu. Mae yma hefyd gacennau caws, piclau, cyffeithiau, olifau, bwyd oer a phoeth, ac amrywiaeth o anrhegion a chrochenwaith.

Mae Gŵyl Fwyd ac Afon Aberteifi wedi bod yn cael ei chynnal ers diwedd y 1990au. Dewch i flasu’r bwydydd lleol gorau gan gynhyrchwyr Cymreig annibynnol a hynny wrth wylio pob math o weithgareddau dŵr ar afon Teifi. Mae mwy i’r byd bwyd yn Aberteifi na bwyd môr. Mae ein glannau mewndirol hefyd yn rhan o fwrlwm yr ŵyl. A honno wedi’i lleoli uwchlaw afon Teifi, mae’n lle gwych i ddarganfod cynhyrchwyr bwyd Cymreig annibynnol a bach, ynghyd â gwneuthurwyr caws llwyddiannus a ffermwyr bridiau prin. Mae’r digwyddiadau ar yr afon yn cynnwys rasys cwrwgl ac arddangosfeydd gan yr RNLI, a hynny’n golygu bod hon yn ŵyl go unigryw. Mae digonedd o bethau eraill i’w gwneud yn Aberteifi, felly pam na ddewch chi ar wyliau bach i’r rhan hyfryd hon o’r gorllewin ar yr un pryd.

Mae Gŵyl Caws Caerffili yn ŵyl rad ac am ddim sy’n cael ei chynnal dros benwythnos yng nghanol y dref. Mae yno stondinau bwyd a diod niferus, ardaloedd a gweithdai cerddoriaeth, sesiynau crefft a ffair.