Teithiau caiacio yng Nghymru

O ddechreuwyr i hen lawiau profiadol, mae Cymru’n berffaith ar gyfer gwyliau canŵio a chaiacio. Mae digon o ddewis o blith llynnoedd mynyddig, camlesi cysgodol ac arfordir gwyllt y wlad. Os ydych chi’n chwilio am weithgareddau â phellter cymdeithasol, mae mynd allan ar y dŵr yn berffaith. 

Mae pob un o’r cwmnïau caiac a chanŵ wedi cael eu gwirio ar gyfer diogelwch, ac maen nhw’n darparu’r holl offer ar gyfer eich amser ar y dŵr – felly does dim angen i chi boeni am siaced achub na rhwyfau. Yn amlwg dylech wisgo dillad ac esgidiau nad oes ots gennych eu gwlychu!

Gwiriwch ragolygon y tywydd cyn i chi gychwyn. Os yw hi’n addo tywydd gwyntog ewch â siaced sy’n atal gwynt, a menig hyd yn oed. Os yw’n heulog, dewch â het a sbectol haul. Hyd yn oed ar ddiwrnodau cymylog, mae’n syniad cael eli haul, am ei bod hi’n rhyfeddol o hawdd llosgi eich croen ar y dŵr.

Mae potel ddŵr a byrbryd bach wastad yn syniad. Ac os ydych chi’n bwriadu tynnu lluniau ar eich ffôn wrth i chi ganŵio, buddsoddwch mewn daliwr sy’n atal dŵr er mwyn ei hongian o gwmpas eich gwddf.

Mae'r rhan fwyaf o bobl yn dueddol o fynd ar daith gaiacio yng Nghymru yn ystod misoedd cynhesach yr haf, diwedd y gwanwyn a dechrau’r hydref, ond gyda’r offer cywir, mae’n hollol bosib rhwyfo drwy gydol y flwyddyn, yn enwedig os oes tywysydd gyda chi.

Mae digonedd o leoliadau gwych yng Nghymru ar gyfer teithiau mewn caiac a chanŵ. Bydd rhwyfwyr mwy mentrus yn dwlu ar gyffro caiacio yn y môr a’r fraint o weld bywyd gwyllt prin. Bydd teuluoedd yn mwynhau hwyl rhwyfo ar lynnoedd llonydd cefn gwlad, tra bo’r afonydd yma’n cynnig rhywbeth ar gyfer pob gallu. 

Gall caiacio yn y môr fod yn brofiad llawn adrenalin drwy ddŵr brochus y llanw a thonnau mawr. Os yw’n well gennych hamddena’n fwy araf, gallwch fwynhau rhwyfo’n ymlaciol ar hyd yr arfordir gan fwynhau’r golygfeydd sy’n gyforiog o fywyd gwyllt. 

Arfordir troellog a bywyd gwyllt prin – ewch mewn caiac yn Sir Benfro, a byddwch yn sicr o gael hwyl. Efallai y gwelwch loi bach morloi tua diwedd mis Awst hyd yn oed. I’r caiaciwr mwy profiadol, mae’r mannau gorau’n cynnwys mynd o Abereiddi i Abercastell ac archwilio’r môr o gwmpas Ynys Dewi. Mae Penrhyn Sant Gofan hefyd yn lle heriol, ond hardd, i rwyfo.

Gall rhwyfwyr â sgiliau canolig a dechreuwyr hyderus fynd ar deithiau hirach, tawelach o archwilio’r cildraethau a’r pyllau bach o gwmpas gogoniant yr arfordir hwn, gyda neb ond ambell forlo a llamhidydd yn gwmni. I rwyfo mewn lle cysgodol, rhowch gynnig ar fynd o Borth-clais i Neigwl.

Os ydych chi’n rhwyfo ar y môr, ein cyngor ni fyddai mynd gyda thywysydd profiadol, yn enwedig os ydych chi’n mentro dipyn o’r lan. Rydych chi’n llawer mwy tebygol o weld amrywiaeth ehangach o fywyd gwyllt fel hyn hefyd.

Chwilio am weithgareddau caiac a chanŵ yn Sir Benfro

Mae dyfroedd cysgodol aber afon Teifi yn Aberteifi’n ddelfrydol ar gyfer mynd am dro bach hamddenol mewn canŵ neu gaiac, a gallwch eu llogi yn y dref. Mae Bae Ceredigion i’r gogledd o Aberteifi ychydig yn fwy gwyllt, a byddai’n well i chi fynd gyda thywysydd. Un llwybr braf yw mynd o draeth Llangrannog tua’r gogledd i Gwmtydu. Gallwch fynd mewn i gildraethau cudd ar hyd y ffordd i nofio, edrych am adar y môr yn plymio oddi ar y clogwyni a chael tamaid i’w fwyta yn un o gaffis y traeth yng Nghwmtydu.

Chwilio am weithgareddau caiac a chanŵ ger Aberteifi

Does fawr ddim mor braf â rhwyfo canŵ’n hamddenol ar lyn llonydd. Heb yr un cerrynt i’ch pryderu, gallwch eistedd yn ôl ac ymlacio – gan fwynhau ennyd o lonydd hyfryd.

Mae cyfoeth o ddewis yn Eryri. Ar Lyn Padarn, ger Llanberis, gallwch rwyfo islaw creigiau serth yr hen chwareli llechi wrth i drenau stêm rheilffordd llyn Llanberis ymlwybro wrth eich ochr. Mae golygfeydd Llyn Gwynant, gan edrych i fyny i gyfeiriad yr Wyddfa, yn syfrdanol, ac mae gan y llyn ei hudoliaeth arbennig ei hun. A Llyn Tegid, ger y Bala, yw un o lynnoedd naturiol mwyaf Cymru, ac mae’n boblogaidd gyda hwylfyrddwyr a rhwyf-fyrddwyr hefyd. Mae’r tri lleoliad yn cynnig cyfleusterau llogi caiac, ynghyd â hyfforddwyr hefyd.

Chwilio am weithgareddau caiac a chanŵ yn Eryri

Rhowch gynnig ar Lyn Syfaddan – yn ôl y chwedl, mae dinas wedi boddi o dan y llyn mawr hwn yn y Bannau. Nid y bydd angen i chi boeni am hynny, am fod y golygfeydd uwchlaw’r dŵr mor fendigedig! Cadwch lygad am bob math o adar dŵr diddorol wrth i chi rwyfo. Gallwch logi rhwyf-fyrddau sefyll, caiacs, canŵau Canada a phedalos oddi wrth Llangorse Lake Boat Hire.

Ochr yn ochr â phob math o fywyd gwyllt ac adar, mae rhwyfo ar hyd un o’n camlesi’n datgelu cipolwg hynod ddiddorol ar ddoniau peirianneg oes Fictoria.

Gerllaw tref ddeniadol Llangollen, gallwch ddarganfod darnau o dreftadaeth ddiwydiannol fwyaf syfrdanol Cymru wrth i chi rwyfo canŵ Canada agored. Mae’n cymryd diwrnod cyfan i rwyfo rhyw wyth milltir drwy gefn gwlad amaethyddol, gan fynd yn hamddenol heibio planhigion dŵr, chwilod sy’n plymio i’r dyfroedd, a glas y dorlan. Fel rhan o’r daith, cewch rwyfo ar draws Dyfrbont Pontcysyllte, y Safle Treftadaeth y Byd anhygoel fry uwchlaw yr Afon Dyfrdwy (peidiwch ag edrych i lawr!) a thrwy ddau dwnnel brics arswydus.

Chwilio am weithgareddau caiac a chanŵ ger Llangollen

Mae camlas gysgodol Aberhonddu a Sir Fynwy’n cychwyn o dref hyfryd Aberhonddu draw i Ddyffryn Wysg. Mae gennych dros 30 milltir i’w darganfod, ac mae’r rhan fwyaf yn ddi-fflodiart. Gallwch ddisgwyl golygfeydd bendigedig yn y Parc Cenedlaethol, hufen iâ mewn pentrefi tlws a digonedd o hwyaid cyfeillgar. Mae sawl lle ar hyd glannau’r gamlas ble gallwch logi caiac a chanŵ gan gynnwys Aberhonddu, Llangatwg a Glanfa Goetre.

I weld rhai o olygfeydd gorau Cymru o ongl wahanol, ystyriwch fynd ar daith ar hyd ein hafonydd dolennog. Gallwch fwynhau diwrnod ar y dŵr a darganfod dolydd a choedwigoedd na fyddai’r un llwybr troed byth yn ei ddatgelu. Wrth gwrs, mae nifer o dafarndai da ar lan sawl afon i dorri syched. 

Mae ochr orau un o hoff afonydd Cymru i'w gweld o ganŵ. Ewch i lan yr Afon Gwy a llogi offer yng Nghlas-ar-Wy. Wedyn gallwch deithio’n hamddenol i lawr yr afon, heibio adar y dŵr a thros ambell ddarn o ddŵr gwyn i gael cinio a chip drwy siopau llyfrau dirifedi’r Gelli Gandryll. Neu beth am fynd dros nos? Bydd rhai darparwyr yn cynnig anturiaethau aml-ddiwrnod, fydd yn mynd â chi i ddarnau o’r afon nad yw rhwyfwyr eraill fel arfer yn eu gweld. Efallai y croeswch chi’r ffin â Lloegr a chyrraedd Symond’s Yat, a hyd yn oed rwyfo heibio i olion dirgel Abaty Tyndyrn. 

Chwilio ble i logi caiac a chanŵ ar hyd Afon Gwy

I gael profiad rhwyfo hudolus gyda’r teulu, ewch ar yr Afon Teifi. Dechreuwch yn y dyffrynnoedd coediog, cysgodol, a chwiliwch am ambell ddyfrgi, crëyr, bwncath a barcud, wedyn ewch ling-di-long nes cyrraedd y môr ger Aberteifi. Ar eich taith, byddwch yn arnofio heibio i Gastell Cilgerran, drwy geunant ac yna drwy wlyptiroedd ble mae’r byffalo dŵr yn pori. Mae tafarn gyfleus yn Llandudoch, sy’n berffaith ar gyfer cinio neu goffi. Y gamp yw dechrau ychydig cyn y penllanw, ac wedyn prin y bydd angen i chi rwyfo o gwbl.

Darllen mwy: Afonydd a dyfrffyrdd bendigedig Cymru

Mae darganfod yr awyr agored yn llawer iawn o hwyl, ac mae’n gyfle gwych i wneud gweithgareddau anturus, ond cofiwch ddarllen am y peryglon, a gwnewch yn siŵr eich bod wedi paratoi o flaen llaw.

• Ewch â dull o alw am help gyda chi
• Gwisgwch ddyfais arnofio bersonol
• Gwiriwch ragolygon y tywydd ac amser y llanw
• Dilynwch y canllawiau hyn gan yr RNLI ynghylch cadw’n ddiogel ar hyd arfordir Cymru
• Ewch i AdventureSmart.uk i gael mwy o wybodaeth ynglŷn â sut i gadw’n ddiogel wrth ddarganfod Cymru.