Gwestai golff a sba moethus

Mae pawb sy’n hoff o golff yn adnabod Celtic Manor Resort wedi iddo serennu yng Nghwpan Ryder 2010, ond mae'n cynnig llawer mwy na golff. Ochr yn ochr â'i dri chwrs pencampwriaeth, sef Roman Road, Montgomerie a Twenty Ten, mae'n cynnig llety moethus, amrywiaeth o fwytai o safon a'r cyfle i ymlacio yn Forum Spa. Gydag amrywiaeth o driniaethau y sba yw'r lle perffaith i fagu nerth ar ôl diwrnod ar y cwrs. 

Wedi'i enwi'n Westy Golff Gorau a Chyrchfan Sba Gorau Cymru am y drydedd flwyddyn yn olynol yng Ngwobrau Golff y Byd 2019, mae’r Vale Resort ychydig y tu hwnt i Gaerdydd yn rhagori ar bob lefel. Mae’r golff ar ffurf dau gwrs pencampwriaeth The Lake a The National (sydd, yn 7,433 o lathenni, ymhlith y cyrsiau hwyaf y tu allan i'r Unol Daleithiau). O ran sba, mae gan Vale Spa 19 o ystafelloedd triniaeth a phum ardal ymlacio bwrpasol sy'n cynnig moethusrwydd arbennig.

Efallai bod Penrhyn Machynys yn gwrs gweddol newydd (agorodd yn 2005), ond mae eisoes yn cael ei ystyried ymhlith y goreuon o ran golff. Gyda’r cwrs cyntaf yng Nghymru wedi’i ddylunio gan Nicklaus, mae wedi cynnal 12 o bencampwriaethau, gan gynnwys dwy bencampwriaeth Royal & Ancient a phedair Pencampwriaeth LET Cymru Ewrop Cwpan Ryder. Mae hefyd yn gartref i Monks Premier Spa, sy'n addo lleddfu eich meddwl, eich corff a'ch enaid yn ogystal â'ch croen a'ch cyhyrau. Brwydrwch y blinder gyda thyliniad bambŵ neu anadlwch yr arogleuon yn yr ystafell aromatherapi.

Mae Marriott St Pierre yn gyrchfan golff o’r radd flaenaf. Gyda dau gwrs parcdir o safon – 7,028 o lathenni yw Championship Old Course a 5,730 o lathenni yw Mathern Course – mae wedi cynnal llawer o gystadlaethau gan gynnwys nifer o ddigwyddiadau Taith Ewropeaidd a Chwpan Solheim. Mae sba The Beauty Rooms yr un mor drawiadol gan gynnig llond gwlad o driniaethau pampro.

Mae cwrs parcdir par-71 Bryn Meadows yn cynnwys digon o heriau yn ei 6,156 o lathenni. Ymhlith yr uchafbwyntiau mae'r ail dwll unigryw, sy’n 557 llath o dwll par-5 gyda thrydedd ergyd anodd dros ddŵr. Oddi ar y cwrs, mae Fusion Spa yn cynnig pwll dan do cynnes, hydrospa, jacwsi a sawl ystafell driniaeth.

Iawn, rydyn ni'n twyllo ychydig gyda hon. Efallai nad gwesty golff mo gwesty moethus St Brides Spa, ond ni fyddai rhestr o sbas Cymru yn gyflawn hebddo. Yn uchel ar glogwyn sy'n edrych dros y môr a thref wyliau Saundersfoot yn Sir Benfro, mae'n gwneud y defnydd gorau posibl o'i leoliad syfrdanol. Mae pwll godidog ac ystafell driniaeth arfordirol ysblennydd gyda ffenestri o'r llawr i'r nenfwd.

I'r golffwyr, mae Clwb Golff Dinbych-y-pysgod gerllaw’n brofiad na ellir mo’i golli. Cafodd ei sefydlu yn 1888, ac mae’n honni’n mai dyma man geni golff Cymru. Wedi'i osod allan gan y chwaraewr a'r dylunydd cwrs o fri, James Braid, mae'n glasur o faes golff sy’n frith o dwyni sydd – fel St Brides Hotel – yn cynnwys golygfeydd godidog o'r môr.