Siopa Nadolig a marchnadoedd y Nadolig yng Nghymru

Lleolir y Gelli reit ar y ffin rhwng Cymru a Lloegr, a dim ond hanner tynnu coes roedd y dref pan ddatganodd ei bod am fynd yn annibynnol oddi wrth y ddwy wlad yn 1977. Dyw’r Gelli Gandryll ddim yn ‘frenhiniaeth annibynnol’ swyddogol, ond wrth i chi grwydro o gwmpas y siopau, mae yna deimlad gwahanol yma, heb os. Mae’r siopa fan hyn yn ymwneud ag unigolyddiaeth o safon uchel, rhydd-feddwl – sy’n ddelfrydol ar gyfer antur siopa Dolig! Bob mis Tachwedd fe gewch chi’r cyfle ychwanegol o fwynhau Penwythnos Gaeaf Gŵyl y Gelli hefyd, sy’n cynnwys gŵyl fwyd a ffair ‘vintage’ ochr yn ochr â’r digwyddiadau llenyddol arferol.

Caerdydd yw un o brif ddinasoedd siopa Prydain. Mae pawb o bwys ym myd manwerthu wedi’u gwasgu i ganol cryno’r dref, sy’n lle i gerddwyr yn unig. Mae canolfan siopa ragorol Dewi Sant yn gyrchfan bwysig ar gyfer enwau a labeli adnabyddus, gan gynnwys siopau mawr fel John Lewis ac Apple yn gonglfeini. Yn nrysfa’r arceds Fictoraidd ac Edwardaidd, fe gewch gyfoeth annibynnol y ddinas, gyda dwsinau o bwtîcs lleol, caffis a delis. Daw’r Nadolig â marchnad stryd dymhorol fawr i ardal yr Aes, tu fas i’r farchnad draddodiadol dan do o Oes Fictoria, sy’n dal i fynd o nerth i nerth ar ôl canrif. Os yw ‘anarferol’ ar eich rhestr siopa, mae emporiwm hen bethau a hynodion Marchnad Jacob yn ddiguro.

Abertawe yw prif ganolfan fanwerthu De Orllewin Cymru, gyda detholiad eang o enwau mawr a siopau annibynnol lleol. Gallwch ddod o hyd i’r rhan fwyaf o’r enwau mawr yng nghanolfan siopa’r Quadrant a Stryd Rhydychen a’r cyffiniau, tra bo’r farchnad draddodiadol enfawr yn ennill gwobr y gorau a’r mwyaf o farchnadoedd dan-do Cymru’n hawdd. Mae’r goreuon o blith siopau annibynnol yn y Parth Annibynnol, sy’n cynnwys yr arceds a’r strydoedd llai oddi ar y brif stryd. Yn ystod tymor yr Ŵyl, mae Marchnad Stryd Nadolig Abertawe’n sefydlu dwsinau o stondinau ar hyd Stryd Rhydychen, i gynnig crefftau, anrhegion a wnaed â llaw, bwyd moethus ac addurniadau Nadolig unigryw.

Bu’r Bontfaen wrth galon ffyniannus Bro Morgannwg erioed, ble bydd gwŷr busnes Caerdydd yn llywio’u Range Rovers ar ddiwedd pob diwrnod gwaith. Yn yr un modd, mae naws y bonedd ar sawl un o siopau, orielau a bariau’r Bontfaen, a welir yn bennaf ar hyd un stryd fawr sy’n ymestyn o un pen y dref i’r llall. Cryfder mawr y Bontfaen yw dillad i fenywod (mae rhyw 18 bwtic yma) ond mae hefyd yn wych ar gyfer anrhegion, gemwaith a chelf. Bydd y Nadolig yn dechrau yma ar ddydd Sul olaf Tachwedd gyda Gorymdaith y Ceirw, pan fydd Siôn Corn yn cael ei lusgo gan geirw go iawn ar hyd y stryd fawr, yng nghwmni torf o goblynnod tymhorol.

Daeth tref dlos Llandeilo, ar fryncyn yn Sir Gaerfyrddin, yn boblogaidd fel diwrnod ble gall siopwyr annibynnol ymgolli, a threulio diwrnod hamddenol ymysg bwtics, siopau gemwaith, orielau a siopau hen bethau’r dref. Yn yr haf, rhaid blasu hufen iâ o Heavenly, ond am ei bod hi’n Ddolig, efallai y dewiswn siocled poeth i’n cynhesu o un o’r llu caffis a thafarndai yn lle.

Dyma gwestiwn cwis Nadolig: sawl siop gadwyn sydd yng Nghonwy? Yr ateb: dim ond tair. Mae pob siop arall – nifer anhygoel o 92.5% – yn cael eu rhedeg yn falch gan fasnachwyr lleol. Dyna dipyn o gamp, sy’n gosod Conwy ymysg pum uchaf Prydain o ran siopau annibynnol. Dyna’r rheswm allweddol hefyd pam fod Conwy’n lle mor wych i wneud eich siopa Dolig.

Er enghraifft, yma y lleolir siop aml-wobrwyog Edwards y Cigydd, emporiwm deganau Yesteryears, Vinomondo ar gyfer gwin da… ac os ydych chi’n dymuno prynu arfwisg (pwy a ŵyr!) wel, The Knight Shop yw’r lle i fynd! Ac mae pob un o’r trysorau hyn wedi’u lapio’n dwt o fewn i furiau tref ganoloesol a gadwyd yn berffaith. 

Mae Arberth wedi disgrifio’i hun fel ‘Bond Street Cymru’. Rydyn ni’n gallu deall pam, Dyma dref farchnad fach hyfryd, ac maen nhw’n haeddiannol falch o gael detholiad gorau holl Sir Benfro o siopau annibynnol, Mae’n arbennig o gryf am fwyd, celf, esgidiau a dillad, ac fel arfer bydd yna farchnad Nadolig i roi hwb i dymor y dathlu.

Mae Betws y Coed yn un o bentrefi mwyaf poblogaidd Eryri, y man perffaith i aros tra’n archwilio mynyddoedd a llynoedd ysblenydd y Parc Cenedlaethol. Mae’r pentref ei hun hefyd yn fan hudolus dros yr ŵyl gyda’i siopau sy’n llawn cynnwys crefftwyr a chynhyrchwyr lleol, ei thai bwyta a’r afon Llugwy sy'n rhedeg drwyddi. Yn flynyddol cynhaliwyd Marchnad Nadolig Eryri a’r Fro sy’n gwerthu nwyddau – cer draw i gefnogi’r busnesau lleol. Yn ystod tymor y Gaeaf bydd y pentref yn cael ei oleuo gyda goleuadau Nadolig prydferth sy’n creu awyrgylch hyfryd i'r ymwelwyr, felly cofia alw yno dros wyliau’r Nadolig .