Does dim ots os ydych chi’n debycach i Bambi nag i Torvill a Dean; mae sglefrio iâ yn ffordd dda o gadw’n heini a mwynhau ar yr un pryd, beth bynnag eich gallu. Cymerwch olwg ar y llefydd gwych yma lle gallwch chi sglefrio, sy’n addas ar gyfer pob oed a gallu.
Sglefrio iâ tymhorol yn Ne Cymru
Llawr iâ, Castell Caerdydd
14 Tachwedd 2024 – 05 Ionawr 2025. Mae Gŵyl y Gaeaf Caerdydd yn ôl yn fwy ac yn well nag erioed. Mae Castell Caerdydd unwaith eto’n gartref i’r atyniad hynod boblogaidd hwn – ewch draw i’r llawr sglefrio dan do a’r llwybr cerdded iâ hudolus am ddigonedd o hwyl yr ŵyl.
Sglefrio yn ICC Cymru, Casnewydd
14 Rhagfyr 2024 - 04 Ionawr 2025. Mwynhewch sesiwn sglefrio yn ICC Cymru yng Nghasnewydd, mae yna stondinau bwyd a diod Nadoligaidd a marchnad i wneud eich siopau Nadolig.
Sglefrio iâ tymhorol yng Ngorllewin Cymru
Gwledd y Gaeaf ar y Glannau yn Abertawe
15 Tachwedd 2024 - 05 Ionawr 2025. Mae Gwledd y Gaeaf ar y Glannau yn dod â’r cyffro Nadoligaidd i ganol dinas Abertawe. Mae’r cytiau alpaidd a’r atyniadau ffair wedi symud i Barc yr Amgueddfa ger Amgueddfa Genedlaethol y Glannau, ac mae hynny ar ben y llawr sglefrio mawr ar gyfer pob oed a’r llawr sglefrio llai i blant yn unig. Beth am fanteisio ar yr ymweliad a mynd i wneud ychydig o siopa Nadolig yr un pryd yng nghanolfan siopa’r Quadrant neu ar hyd Stryd Rhydychen.
Sglefrio iâ drwy gydol y flwyddyn yng Nghaerdydd, De Cymru
Canolfan iâ Cymru, Bae Caerdydd
Os nad ydych chi erioed wedi sglefrio o’r blaen, neu i'r gwrthwyneb rydych yn awyddus i gystadlu yng Ngemau Olympaidd y Gaeaf y tro nesaf, mae Canolfan Iâ Cymru yn cynnig cyrsiau addas ar gyfer pob oed a lefel. Neu gallwch archebu lle mewn sesiwn sglefrio agored, llogi sgidiau sglefrio a mentro eich ffordd eich hun ar yr iâ.
Wedi ei leoli ym Mae Caerdydd, mae’n safle aml-ddefnydd unigryw ac iddo ddau lawr sglefrio a seddi gwylio i dros 3,000 o bobl. Mae hefyd yn gartref i dîm hoci iâ y Cardiff Devils, sy’n chwarae yng Nghynghrair Elît Hoci Iâ Prydain, sef y safon uchaf posib ar gyfer hoci iâ yn y Deyrnas Unedig.
Sglefrio iâ drwy gydol y flwyddyn yng Ngogledd Cymru
Arena Iâ Glannau Dyfrdwy, Sir y Fflint
Mae’r ganolfan yn cynnig gwersi sglefrio iâ i grwpiau oedran amrywiol, cymorth sglefrio, bar byrbrydau, a hyd yn oed disgo ar iâ. Dyma un o ddim ond dwy arena yng Nghymru a chaiff ei defnyddio fel safle hyfforddi i’r sêr sy’n cymryd rhan ar raglen deledu ITV, Dancing on Ice. Archebwch docynnau o flaen llaw.
