Cyrsiau addysgiadol a phrofiadau yng Nghymru

Mae cyrsiau a gwyliau addysgiadol yn gyfle i herio eich hun a phrofi rhywbeth gwahanol, ac ar ben hyn, gall wneud gwyrthiau i’ch CV a’ch proffil Linkedin.

Mae ymchwil yn awgrymu fod dysgu gydol oes – boed hynny ar ffurf crefft neu ddiddordeb newydd – yn cynyddu eich llesiant meddyliol, eich hunanhyder a’ch hapusrwydd cyffredinol. Mae rhoi cynnig ar rywbeth newydd yn un o ‘Bum llwybr at lesiant’ yr elusen iechyd meddwl Mind Cymru, ynghyd â chysylltu, symud, rhoi, a thalu sylw. Felly mae herio ein hunain i ddysgu pethau newydd yn llesol i'n hiechyd meddwl hefyd. 

Dyma flas ar rai o’r profiadau sydd ar gael yma yng Nghymru. 

Mae Canolfan y Dechnoleg Amgen yng Nghanolbarth Cymru’n cynnig amrywiaeth o gyrsiau, sy’n amrywio o wneud eich cartref neu swyddfa’n fwy eco-effeithiol, i gyrsiau garddio sy’n rhoi cyfle i chi ddeall sut i helpu bywyd gwyllt i ffynnu yn eich gardd. Mae cyrsiau eraill yn cynnwys sut i warchod a gofalu am wenyn a sut i adeiladu cartrefi naturiol ac iach.

Mae rhai o’r cyrsiau’n cynnig cyfle i chi aros ar y safle yn llety eco'r ganolfan ar gyrion Parc Cenedlaethol Eryri ger Machynlleth.

Lleolir saith safle Amgueddfa Cymru yn rhai o leoliadau mwyaf unigryw Cymru, gan ddarparu’r lleoliad delfrydol i roi cynnig ar rywbeth newydd. Ysbrydolir y cyrsiau byrion gan wrthrychau a straeon o blith casgliadau’r Amgueddfa, gan gynnwys gwaith gof, cerfio llwyau a gwaith lledr, yn ogystal â gwehyddu basgedi a matiau. 

Darllen mwy: Ein saith amgueddfa genedlaethol

Yn harddwch naturiol Parc Cenedlaethol Eryri, mae Canolfan Grefftau Corris yn darparu profiadau bendigedig mewn naw stiwdio grefft unigryw. Mae amrywiaeth o weithdai gan gynnwys dipio canhwyllau, adeiladu dodrefn, peintio crochenwaith a gwneud siocled, a’r cyfan dan ofal gwneuthurwyr arbenigol. 

Dechreuwch bennod gyntaf eich taith lenyddol yn Nhŷ Newydd Llanystumdwy, Canolfan Ysgrifennu Genedlaethol Cymru. 

Mae Tŷ Newydd, adeilad hanesyddol Gradd II o dan ofal Llenyddiaeth Cymru, yn fan hudolus sy’n gyforiog o ddiwylliant. Gallwch dreulio diwrnod neu wythnos gyfan yn y lleoliad bendigedig â golygfeydd dros Fae Ceredigion.

Cynigir amrywiaeth o gyrsiau dwyieithog yn amrywio o farddoniaeth i chwedlau gwerin, ysgrifennu creadigol i adrodd straeon. Gallwch gael eich ysbrydoli gan awduron proffesiynol mewn gweithdai a sesiynau unigol. Ac os yw’n well gennych fod ar eich pen eich hun, mae’r Bwthyn Encil yn lle braf i gael llonydd.

Anghofiwch y sgriniau, codwch babell a dysgwch sgiliau awyr agored. Mae digon o weithgareddau crefftau’r goedwig ac awyr agored ar gael ledled Cymru o gyrsiau diwrnod, penwythnos neu gyrsiau wedi’u teilwra’n benodol ar gyfer unigolion, parau a theuluoedd.

Mae Morfa Bay yn ganolfan antur awyr agored sy'n dysgu sgiliau yn y coetiroedd cyfagos - rhowch gynnig ar grefftau tân, coginio, chwilota am fwyd, cerfio â llaw ac adeiladu lloches. Mae Anelu yn Nhregarth yn cynnig profiadau awyr agored a theithiau cerdded a dringo yn harddwch Parc Cenedlaethol Eryri, neu mae Bushcraft Adventures yng Nghasnewydd yn cynnig sesiynau saethyddiaeth, taflu bwyell a gweithgareddau awyr agored eraill i deuluoedd.