Taith ramantus i fan gorffwys nawddsant cariadon Cymru, Santes Dwynwen.

Ar arfordir gorllewinol Môn, tu hwnt i Niwbwrch, mae Llandddwyn - un o fannau mwyaf rhamantus Cymru. Ewch heibio’r twyni tywod, coed pinwydd a gwiwerod coch Gwarchodfa Natur a Choedwig Genedlaethol Niwbwrch ac ar y pentir fe welwch adfeilion eglwys nawddsant cariadon Cymru, Dwynwen. Pan fo’r llanw ar drai mae modd cerdded draw, ond cofiwch edrych ar yr amseroedd llanw a pharatoi o flaen llaw.

Rydym, wrth gwrs, yn dathlu Santes Dwynwen bob blwyddyn ar 25 Ionawr, ond mae cyplau yn mynd ar bererindod rhamantus trwy gydol y flwyddyn i Landdwyn, ac yn syrthio mewn cariad ag arfordiroedd gwyllt a threfi a phentrefi tlws Môn ar eu taith. 

Gyda’r holl fwytai a chynnyrch lleol blasus, a rhan helaeth o dirwedd yr ynys wedi’i dynodi yn Ardal o Harddwch Naturiol Eithriadol (AHNE), mae Môn yn lle perffaith ar gyfer gwyliau neu ddiwrnod rhamantus.

Llanddwyn oedd enw’r pod cyntaf i agor yn Llanfair Hall nôl yn 2013, arwydd mwy na thebyg o naws rhamantus y safle. Bellach mae ganddyn nhw bump pod pren hardd wedi'u hinswleiddio â gwlân, cwt bugail gyda thwb poeth sy'n cael ei danio â phren, a chasgliad o bebyll glampio. Gyda'r nos, gwnewch ddefnydd o'r popty pren a'r toes pizza figan sy’n cael ei baratoi ymlaen llaw, cymerwch lymaid o botel o gwrw Bragdy Mona neu Bragdy Cybi o'r siop ar y safle, yna ymlaciwch a mwynhau awyr dywyll Môn. 

Archebwch becyn brecwast ar gyfer y bore sy’n cynnwys wyau o’r fferm a chig lleol a gwnewch yn siŵr eich bod yn dweud wrth y perchnogion os oes gennych rywbeth i’w ddathlu, a byddant yn siŵr o fod yn ddigon caredig i drefnu blodau, cacennau neu siampên ymlaen llaw. 

Awydd cerdded rhan o’r 125 milltir ar hyd Llwybr Arfordir Môn? Gallwch ofyn i gael eich tywys i fan cychwyn o'ch dewis, a threfnu i gael eich casglu ar ddiwedd y dydd. Neu os oes gennych gar trydan mae pwynt gwefru trydan ar y safle os oes angen.

Darllen mwy: Canllaw defnyddiol i Lwybr Arfordir Cymru.

Mae tref Porthaethwy yn agos a’n llawn siopau annibynnol diddorol. Caffi figan y Green Olive yw'r lle am frecwast a chrempog, ac mae deli & Caws yn nefoedd i'r rhai sy'n hoff o gaws - archebwch docyn i un o'u clybiau swper cawslyd. Mae Dylan’s yn wych ar gyfer bwyd môr lleol a llawer mwy. Mae ganddyn nhw siop yn y dref hefyd sy'n gwerthu sawsiau, bara a phrydau i'w mwynhau adref.

Yng ngogledd yr ynys, ychydig y tu allan i dref borthladd Amlwch, mae ffermdy o’r 17eg ganrif, Fferm Lastra. Mae’r gwesty a’r bythynnod hunanarlwyo yn fan gwych i aros os am grwydro Teyrnas Gopr Mynydd Parys neu draethau tywodlyd Lligwy, Moelfre a Benllech.

Mae’r bwyty a’r bar yn falch iawn o gynnig cynnyrch lleol Môn, ac yn gwneud defnydd gwych o’r hyn sydd ar garreg eu drws gan gynnwys cynnyrch wedi’i fygu o’r Cwt Mwg, Caws Rhyd y Delyn a Seidr Jaspels.

Mae croeso mawr i gŵn yn Lastra, ac mae croeso iddynt yn y bar, y patio a'r ystafelloedd gwely. Mae teithiau cŵn ar gael sy’n cychwyn o’r safle a darperir bagiau baw a powlenni dŵr, yn ogystal â fflach lampau ar gyfer mynd â chŵn am dro ar ôl iddi nosi.

Darllen mwy: Gwyliau i chi a'ch ci ar Ynys Môn.

Mae’r Bull’s Head Inn yn adeilad rhestredig Gradd II llawn cymeriad sy’n dyddio’n ôl i’r 15fed ganrif. Mae’r cynigion swper, gwely a brecwast yn berffaith ar gyfer cyplau. Mwynhewch brydau swmpus a chwrw Cymreig yn y bar hynafol wrth y tân agored.

Tafliad carreg oddi yma mae Castell Biwmares - un o bedwar castell Treftadaeth y Byd UNESCO yng Nghymru, a'r olaf a grëwyd gan Edward I (er na chafodd gyfle i’w orffen yn llwyr). Os ydych yn ymweld rhwng dechrau Ebrill a diwedd Gorffennaf mwynhewch daith ar y Seacoast Safari i Ynys Seiriol - bydd y palod yn nythu a chyda lwc mae’n bosib y gwelwch chi ddolffin neu ddau hefyd!

Mae opsiynau llety eraill ym Miwmares yn cynnwys gwesty Sioraidd y Buckley a gwesty’r Bishopsgate.

Mae sba a phwll St David’s yn cynnig triniaethau harddwch a phecynnau ymlacio sy’n edrych dros Draeth Coch, rhan o’r Ardal o Harddwch Naturiol Eithriadol (AHNE) ar arfordir dwyreiniol Ynys Môn.

Mae rhai pecynnau yn cynnwys cinio ym mwyty'r safle, The Tavern on the Bay, sy'n gweini bwydlen leol dymhorol a choctels.

Mae’r sba moethus ym mhlas Tre-Ysgawen yn cynnig ystod eang o therapïau a thriniaethau harddwch, ac mae’r ystafell thermol yn cynnwys ffynnon iâ ac ystafell therapi halen. Mwynhewch fore hamddenol yn nofio neu llosgwch egni yn y gampfa cyn ymweld â'r caffi am ginio.