Pryd o fwyd allan

Thomas by Tom Simmons, Caerdydd

Bwyd Ffrengig sydd wedi ysbrydoli’r fwydlen ym mwyty'r cogydd adnabyddus Tom Simmons, ond cynhwysion lleol sydd wedi eu defnyddio i greu’r prydau. Mae bwydlen Santes Dwynwen arbennig y bwyty yn cynnig gwledd chwe chwrs am £75 gyda chynhwysion fel cig oen Sir Gaerfyrddin a bara becws Ground yn serennu.

Pryd o fwyd adref

Dylan’s, Porthaethwy a Chonwy

Mae gan Dylan's siopau ym Mhorthaethwy a Chonwy yn gwerthu cynnyrch lleol ffres a phrydau a phitsas i bobi adref. Yn ddiweddar fe lansiwyd Pasta Môn - dewis o basta ffres, sawsiau ac antipasti. Y ffordd hawdd o goginio pryd rhamantus adref.

Bocsys blasus

Mae nifer o fusnesau yn cynnig bocsys o ddanteithion wedi eu creu yn arbennig ar gyfer Santes Dwynwen, y gellir eu postio i unrhyw le. Mae bisgedi Sweet Snowdonia o Gonwy yn anrheg perffaith i gyd-fynd â chwpan o goffi neu wydriad o bybli, ac yn gallu cael eu dosbarthu yn lleol yn ardal Conwy neu eu hanfon trwy’r post i unrhyw le.

Digwyddiadau unigryw

Gigs Santes Dwynwen 

Gigs 25 Ionawr, 2025 

  • Steve Eaves a Rhai Pobl, Lloft, Y Felinheli. Bydd bwydlen tapas arbennig ar gael. 
  • Bob Delyn a'r Ebillion, Neuadd Ty'n y Porth, Penmachno. 
  • TewTewTennau, Bau Cat + Maddy Elliot, Neuadd Goffa Llanfair Talhaearn 
  • Gwilym Bowen Rhys Trio + Elin a Carys, Cae Cymro, Clawddnewydd
  • Morgan Elwy, Tŷ Siamas, Dolgellau
  • Pedair, Neuadd Coedybryn, Ffostrasol
  • Alffa + Mattoidz + Ffatri Jam, Cwrw, Caerfyrddin
  • Rhys Gwynfor a'r Band + Cwtsh, Clwb y Bont, Pontypridd

Am fwy o gigs Cymraeg ewch i wefan awni? 

Celf, crefft a chariad

Dathliad o gariad platonic trwy gelf a chrefft. Cyfle i greu breichledi gyda ffrindiau a theulu dan arweiniad yr artist Mari Gwenllian (HIWTI). 

Gŵyl Caru dy Iechyd Meddwl

Digwyddiadau amrywiol yn Sain Ffagan, Big Pit a'r Amgueddfa Wlân yn dangos sut all amgueddfeydd a sefydliadau treftadaeth wella eich iechyd meddwl. Ymysg y gweithgareddau mae gweithdai gwehyddu, perfformiadau cerddorol, teithiau natur, a gweithdy creu calon metel gyda gof. 

Anrhegion

Mêl Gwenyn Gruffydd

Mêl Cymreig a gynhyrchir yn Sir Gaerfyrddin. Mae Gwenyn Gruffydd yn gwerthu pecynnau Santes Dwynwen arbennig sy'n cynnwys canhwyllau a nwyddau harddwch wedi eu creu o gwyr gwenyn.

Siocled Mr Holt's

Siocled Cymreig y cogydd o Fôn, Richard Holt. Mae'r ffatri yn Llangefni yn cynhyrchu wyth o fariau siocled gwahanol, pob un gydag enw Cymraeg. Y cwmni teuluol sydd hefyd yn rhedeg Melin Llynon. 

Macarŵns melys

Macarŵns mafon a fanila gan un o gaffis gorau'r gorllewin, Crwst. Archebwch ar-lein ac yna casglu o'r siop yn Aberteifi.

Straeon cysylltiedig